di AGOSTINO BELLONI
Semus appenas torrados dae su sigundu ziru continentale de custu inissiu de veranu chi, grassias a s’organissassione e a su finantziamentu de sos Circulos de sos Sardos, at bidu sa cumpanzia nostra I Barbariciridicoli prutagonista cun duos differentes ispettaculos, prima in Piemonte cun “Carla o dell’essere se stessei” (chi amus presentadu in Torino, Nichelino e Vercelli) e poi in Toscana cun “Skabaretch” (presentadu a Livorno e in s’Isola d’Elba).
In pius de sos applausos, galu intendimus forte su riverberu de su calore e de sos abbrazzos, des sos sorrisos e de sos risos, de sos contos e de sos cantos, de sas poesias e de sas brullas, chi ant caratterizzadu custas pagas dies a cuntattu cun sos caros cunterraneos emigrados in continente, sorres e frades nostros, zente de gabbale, pessonalidades riccas, chi sa Sardigna e s’identidade l’ant in su coro, meda prus de nois chi semus e vivimus totu s’annu in sa bellissima terra nostra.
Gigantes!
Non sos de Monte Prama, non sos de sas Tumbas Nuragicas, ma gigantes modernos, chi, urande tempus pretziosu a sa propria vida personale e a sa familia, s’arrabbatant pro sa Sardigna, faghinde eventos e manifestassiones, ospitande artistas e gruppos, bendinde produttos sardos, faghinde bigliettassione, organizzande festas, presentassiones, riuniones, convegnos, insomma, unu tribagliu immensu de promossione de valore incumparabile, chi non b’at dinare a lu pagare (e difattis lu faghent gratuitamente!), totu promore, pro amore e in numene de sa Sardigna.
Est parte vona grazie a issos, chi nois e atteros artistas sardos onzi tantu podimos faghere biere cun fieresa s’arte nostra in continente, superande cussu mare chi dae semper, in su bene e in su male, marcat sa distantzia.
E est pro tottu custu chi, comente amus tentu modu jà de narrere, sa Sardigna diat esser zustu chi siat muntovada non prus comente un’Isola ma comente unu Arcipelagu, ca sos Circulos de sos Sardos non sunt atteru chi atterettantas minores isolas sardas isparzinadas in Italia e in su mundu.
Medas grassias duncas a s’Arcipelagu de Sardigna e grassie de coro a sos Circulos de Torino, Nichelino, Rivoli, Vercelli, Livorno e Isola d’Elba (e a tottus sos atteros chi nos ant ospitadu prima de occannu) pro nos aere permissu de esprimere s’arte teatrale nostra e pro aere fattu brillare sos occros nostros cun su lugore de sos brostos.
A nos biere in presse e sanos.
I Barbariciridicoli
