SIGNIFICADU ISTORICU E VALORE CULTURALE PRO SOS DISTERRADOS DE “SA DIE DE SA SARDIGNA”, FESTA DE SU POPULU SARDU

di PAOLO PULINA

Come preannunciato da Paolo Pulina nel suo articolo pubblicato su questo sito  (si veda al link: https://www.tottusinpari.it/2021/04/29/sa-die-de-sa-sardigna-2021-festeggiata-dalla-f-a-s-i-con-una-videoconferenza-celebrativa-di-giovanni-maria-angioy-bono-1751-parigi-1808-nel-270-anniversario-de/  ), si pubblica qui di seguito il testo della sua relazione in sardo logudorese sul significato storico e simbolico che ha per gli emigrati sardi la festa de “Sa Die de sa Sardigna”. La relazione è stata letta da Pulina con pronuncia del suo paese di origine (Ploaghe, in provincia di Sassari) durante la videoconferenza organizzata dalla F.A.S.I.,  il 28 aprile, per festeggiare “Sa Die de sa Sardigna” con una commemorazione di Giovanni Maria Angioy (Bono, 1751 – Parigi, 1808) nel 270° anniversario della nascita.

Link per il video di Pulina: https://youtu.be/-59pq-6RDH8

“Sa Die de sa Sardigna”, “sa festa de su populu sardu”, est istada istabbilìda pro su 28 de abrile dai una lege de sa Regione Sardigna de su mese de cabidanni 1993, in ammentu de su 28 de abrile 1794, die de s’istorica dipaciàda chentza violèntzia  (il cosiddetto “scommiato”) de sos piemontesos dai sa Sardigna in su cuntèstu de sos motos antifeudales de su trienniu revolutzionariu sardu (1793-1796).

Sa data de su 28 de abrile 1794 ada unu significàdu profùndu de valòre istoricu in su camìnu e in sos abbojos chi ana ivvilupadu su desìzu de sa libertade tzivile e de s’autonomia in s’animu de su populu sardu; signale mannu, simbolicu e culturale, de una situatzione inue totu sos sardos ana chèrfidu dimustrare unidade contra s’opressiòne “foràna”, “istrànza”, duncas “furistera”.

Cussa die, connòschida comente momentu de “emozione popolare”, sos casteddajos in cuntierra accumpagnana – chentza violèntzia, ma cun fierèsa sarda –  sos piemontesos (umpare a su vicerè) a sas naves; totu zente furistera chi aìat leàdu possessu de s’isola dae candho s’Austria aiat tzèdidu sa Sardigna a sos Savoia cun sos tratados de Londra (1718) e de L’Aia (1720).  

Pro cumprendher mèzus cussas dies, bastat de leàre in considèru calchi fatu. Sos piemontesos no fin pro nudda rispetosos de sa dignidade de sas pessones sardas e, chentza imbòligos o impreu de ateras peraulas, los giamaìan “molenti” (àinos). Sos istoricos aporrini s’ammentu de una quartina impreàda dai sos funtzionarios de su vicerè: “Tirilì, tirilì, crepino i sardi/ noi piemontesi restiamo quì/ tirilà, tirilà, crepino i sardi/ noi piemontesi restiamo quà”.

Sos populanos de Casteddu no atrivin peruna fura de sos benes chi sos piemontesos garrigan in sas naves (sos istoricos arrelatan chi su masellaju Francesco Leccis cumbinchet s’atrupamentu de zente in rebelliòne a no iboidare cun violentzia sos casciones de sos piemontesos, cun custas peraulas: “Lassàdelos andare: sos sardos,  mancari pòveros, no an tzertu bisonzu de su ledàmine de sos piemontesos!”).

Totu ischin de sa manera impreàda dae sos casteddajos pro distinghere e sedatare sos piemontesos: in casu de dubbiu beniat fatu s’interrògu e verificadu si fin capatzes de pronuntziare in modu perfetu sa peràula campidanesa cixiri.

Custa tennica fit istada pratigàda in Sitzilia, a su tempus de sos Vespri siciliani (30 de martu 1282), pro reconnòschere sos frantzesos.

Ma torramus a sa Sardigna. Sa protesta de sos casteddajos, a nòmene de totu sos sardos, aiat pro mèria su modu ofendhidore chi fit istadu aparitzadu a sos militzianos sardos, chi calchi annu  prima aìan difesu siat Casteddu chi Sa Maddalena (a s’assediu de cust’ultima bi fit fintzas su giòvanu Napoleone Bonaparte) dai sos atacos de sos Frantzesos, disizòsos de difundhere sos ideales de libertade revolutzionaria comintzada,  cun s’assaltu de sa Bastiglia, su 14 de triulas 1789 (atera die nòdida chi at dadu origine a una festa natzionale!).

Chentza cussa difesa, fata pro onorare su vìnculu de fidelidàde giurada a sos Savoia, su feudalesimu in Sardigna fit istadu irraighinadu nessi 50 annos a prima de cantu istoricamente s’est avveràdu. Ma cussa dimustratzione de unidade est servìda a su populu sardu candho, leada cussentzia, at cumpresu sa netzessidade de dever gherrare contra sos feudatarios chi los fin umiliendhe; contra chie no aiat reconnotu, o no aiat chèrfidu cumprendher, su cumportamentu sintzeru e s’impignu leale de sos sardos.

At iscritu Gerolamo Sotgiu: “Seguendo le indicazioni del vicerè Balbiano, le onorificenze militari furono accordate, con evidente ingiustizia, alle truppe regolari, che avevano dato così misera prova di sé. […] Alla Sardegna, che aveva conservato alla dinastia il regno, venne concessa ben povera cosa: 24 doti da 60 scudi da distribuire ogni anno per sorteggio tra le zitelle povere e l’istituzione di quattro posti gratuiti nel Collegio dei nobili di Cagliari; altre simili miserie”.

Bisonzat poi faeddare de s’ofesa inferta a sos sardos dai su re Vittorio Amedeo III, chi no est bènnidu incontru  a sas chimbe pregùntas de sos Istamentos: 1) adunantzia de sas Cortes Generales pro tratare argumentos relativos a sos  bisonzos pubblicos; 2) cunfirma de totu sas lezes de traditzione; 3) riserva de impiègos pro sos sardos; 4) costitutzione de un Consizu de Istadu pro miminare su podere ismisuradu de su vicerè; 5) nomina de unu ministeriu pro tenner cura de sos affares de Sardigna in sa corte de Torinu.

Sa corte piemontesa, in cussa ocasione, no riconnoschendhe sa possibilidade de esistentzia  de sa Natzione Sarda, rispondhet palabàla-costagosta a su vicerè e no a sos ambasciadores sardos (custu faghet cummentare a s’istoricu Giuseppe Manno: “da ambasciatori senza parola, erano poi anche riusciti messaggeri senza risposta”).

In custu cuntestu revolutzionariu  (calchi istoricu de oe faeddat de cussos tempos – in modu bigonzosu! – comente dies de torbidi (abbulòtos); sendhe chi tocat de lègere s’obera de unu movimentu chi faghet s’istoria cun cussentzia de populu) est obligu de fentomare duos nòmenes: Francesco Ignazio Mannu (poeta de sa Marsigliese sarda, sa cantone “Innu de su patriota sardu a sos feudataros”, chi cominzat cun versos meda giaros: Procurade ’e moderare / Barones sa tiranìa, / Chi si no per vida mia / Torrades a pè in terra. / Declarada est già sa gherra / Contra de sa prepotenzia / E cominzat sa passienzia / In su populu a faltare) e massimamente Giommaria Angioy, nàschidu a Bono su 21 de santuaini 1751, pigàdu fintzas a s’ingàrrigu de zuìghe de sa Reale Udientzia, definìdu da calchi istudiosu istoricu “su pius famadu martire laicu sardu”, protagonista de importu mannu pro sos motos antifeudales de su trienniu revolutzionariu sardu (1793-1796).

Angioy, imbiàdu in su mese de frearzu 1796 a Tàtari comente Alternòs de su vicerè, s’est postu a guidare unu movimentu antifeudale. Giovanni Spano, in d’una proa istorica de su 1875 intitulada “La rivoluzione di Bono del 1796 e la spedizione militare” (imprentada parìtzos  annos faghet dai su Comunu de Bono),  regoglit su sensu de sa vitzenda già in sa prima pagina de s’iscritu: “Nel 3 febbraio 1796 Angioy fu mandato dal vicerè Filippo Vivalda, e dagli Stamenti Sardi, nella qualità di Alternos, per sedare i tumulti del Capo settentrionale dell’Isola, e specialmente del Logudoro, dove più di 40 villaggi si erano confederati per abbattere l’orrendo mostro del feudalesimo. Ma egli, esaminando da vicino le crudeli vessazioni, le soperchierie dei ministri, che vi mandavano i Feudatari, e gli abusi, in vece di rappaciare le popolazioni, si diede ad avvalorare le giuste aspirazioni delle medesime per l’emancipazione feudale che da tempo chiedevano”.

Su movimentu antifeudale conduìdu dai Angioy est istadu frimmàdu dae s’Armistitziu de Cherasco e dae sa Paghe de Parigi (1796) tra su Piemonte e sa Frantza. S’eroe de sa revolutzione natzionale sarda est istadu custretu a fuire in Frantza, inue est vìvidu in esiliu – aggiuendhe cantos aìan bisonzu, tantu de si reduìre in povertade – fintzas a sa morte, bènnida su 23 de su mese de frearzu 1808, a 57 annos. In perunu campusantu de Parigi est istada agatada sa tumba sua.

Cùnsidero de impòrtu mannu chi oe su populu sardu (cun sos disterrados de s’Italia continentale e de totu su mundhu) reconnoschen custa die nòdida e de festa pro ammentare unu de sos periodos istoricos pius riccos de significàdu e de idealidàdes; fintzas meda prus de su 26 de su mese de frearzu 1948, die ammentada pro sa pubblicatzione chi at reconnoschidu s’Istatutu Ispetziale pro sa Sardigna.  Sa letzione de s’istoria nos at imparadu chi, comente in cussas dies de su 1794, sas conquistas e sos diritos no benin in donu e si poden otennere solu cun su contribbutu unitariu de su populu sardu: duncas umpare a totu sos disterrados de Sardigna, chi “metaforicamente vogliono rappresentare uno dei quattro mori, finalmente senza benda sugli occhi, che compaiono nello stendardo sardo”.