IN LIMBA, L'IPOTESI DI RIFORMA DELLO STATUTO DELLA REGIONE SARDEGNA: LA TESTIMONIANZA ALLA TAVOLA ROTONDA DEL CIRCOLO "SEBASTIANO SATTA" DI VERONA DEL PRESIDENTE DELLA F.A.S.I.

di Tonino Mulas

Salude a totus sos cumpanzos chi oje sunt inoche pro arresonare cun nois de s’istatutu e de sas riformas istitutzionales. Depo nàrrere una cosa prima de cumintzare: b’at un’ispètzia de paristòria riferia a s’istòria de sa Sardigna, chi rappresentat  sas contraditziones de s’istòria nostra, sos chi in italianu sunt i paradossi.

Sa batalla pro s’autonomia durat dae meda, dae sa fine de su ‘700 nessi e in su 1847 sos piemontesos, ca b’est istà pressione dae parte de sas classes dirigentes sardas, no ch’ant mòviu  s’ùnica forma autonomìstica chi teniamus: sos Istamentos e sa Reale Udièntzia, fachende imbetzes sa chi si mutit Unione Perfetta ai Regi Stati di Terraferma.

Duncas sos piemontesos nos ch’ant  mòviu  s’unica forma de autonomia chi teniamus.

A pustis sa secunda gherra mundiale s’est fata sa Consulta pro iscrìvere s’istatutu de autonomia e, sicomente non s’arribaat a detzìdere,  Emìliu Lussu aiat cussizau a sos sardos de adotare comente modellu s’istatutu sicilianu ca teniat medas poderes, medas cumpetèntzias.

Ma sos consultores sardos si sunt pesaos lìberos e non ant chertu intèndere de dimandare de adotare pro sa Sardigna su matessi istatutu aprovau dae sa Costituente pro sa Sicìlia ca diat chèrrere nàrrere a si privare de sa libertade de pòdere iscrìvere issos e totu un’istatutu autonomìsticu e si sunt bortaos contr’a Lussu, Fancello e Siglienti.

E ant pèrdiu una ocasione manna ca s’istatutu sardu, aprovau dae sa Costituente a primos de su 1948, at medas prus pacos poderes de s’istatutu sicilianu, galu oje.

Duncas s’est presentà su matessi una contraditzione puru tando: sos sardos no ant otentu prus poderes pro una chistione de printzìpiu.

E custu nos òbbligat a intrare in su mèritu de sa chistione de sa reforma statutària, a bìere sa situatzione de oje, tenende contu chi sas cosas sunt cambiàs, chi, comente ant narau puru sos oratores chi ant allegau prima, b’est istau su federalismu, sa riforma de sa Costitutzione de sa Repùbbrica chi dèlegat prus poderes a sas regiones.

Unu tema chi nos fachet discùtere est s’istrumentu de impreare pro sa reforma: la depet fàchere su cussizu regionale o s‘assemblea costituente?

Nois emigraos fimus presentes in sos atòbios pro s’assemblea costituente siat pacu prus de deche annos fachet, siat a pustis.

E tando fimus de acordu chin custu istrumentu pro iscrìvere s’istatutu novu de autonomia.

Ma non podimus non tènnere contu chi sa Corte Costituzionale nos at botzau una proposta de istatutu proite bi fit sa paràgula soverania.

Nois semus galu de su pàrrere chi s’assemblea costituente diat èssere su menzus istrumentu ca pèrmitit de istabilire unu raportu de fortza prus mannu in sos arresonos chin su parlamentu pro otènnere s’aprovatzione de sa proposta de sos sardos.

E semus pro s’assemblea costituente ca est s’ùnicu modu pro pòdere permìtere puru a sos emigraos de picare parte a custos arresonos, ca nois puru nos cussideramus parte de su pòpulu sardu mancari chi che siemus in foras.

E fàchere intèndere sa fortza de su pòpulu sardu, paris chin sos emigraos,  pèrmitit abberu de tènnere prus fortza cuntratuale chin s’istadu pro nos fàchere rispetare.

Si imbetzes est su cussizu regionale chi dècidit totu, semus rinuntziande a un istrumentu forte pro de pònnere unu dèbile.

E tando torrat cudda contraditzione de sa cale apo allegau a su cumintzu.

E goi nois emigraos non semus postos in conditziones de dare su contributu nostru, ca non bi semus in cussizu regionale, antzis non nos ant mutiu mancu a sa discussione chi ant fatu in cussizu regionale cando an sortiu sos istados generales pro sas reformas a primos de Santu Gavini colau. Fortzis non ch’ant fatu in tempus a nos mutire ca sas convocatziones sunt istàs tropu lestras, ma intantu non bi fimus.

A pustis de àere allegau de s’istrumentu chi depet iscrìvere s’istatutu, depimus puru nàrrere comente lu cherimus cust’istatutu, depimus arresonare de sa zenia de autonomia nova chi cherimus perparare, depimus marcare sos poderes de sa regione e sos de s’istadu in modu chi non bi sian cunflitos e tenende contu de sa reforma federalista.

Amus marcau àteras bortas chi s’istatutu de como fit tropu economicista, e su novu depiat imbetzes puntare prus a sos temas de s’identidade, de sos benes immateriales, de sa limba, de sa cultura, de s’iscola.

Ma cando bidimus sas protestas de sos pastores, de sos operajos chi che sunt perdende su postu de triballu, tando nos cumbinchimus chi cudda visione de s’economia, de sa rinàschida chi b’est in s’istatutu de oje, bisonzat de la sichire a pònnere in atu in modu chi si colet dae sas ruinas de s’industrializatzione  a un’àtera economia, moderna ma rispetosa  de s’ambiente , eco-compatìbile e non comente s’indùstria petrolchìmica chi at fatu prus male chi non bene e non at isperas de mezorare in su tempus benidore.

Sos temas a sos cales depimus puntare sunt:

sa chistione de s’identidade;

sos trasportos;

su reconnoschimentu de s’isularidade;

sa rappresentàntzia de sos sardos in Europa.

E puru in su cussizu regionale pro pòdere èssere trataos comente tzitadinos de sèrie A  non de sèrie B.

Credo chi custu dibàtitu siat istau produtivu pro afinicare sos temas chi in Sardigna sunt de atualidade manna.

Gràtzie e Adiosu