TOTTUS IN PARI 1000: CANDU SA CULTURA DE SU DISTERRU FAGHET “MILLI”

di GIANRAIMONDO FARINA

Apo pensadu de iscriere custu articulu in sardu. Sa limba nostra. Et, de su sardu, apo respetadu sas normas et sas indicatziones de sa L. S. C., sa Limba Sarda Comuna. A dolu mannu dae tempus ruta in abbandonu. Mescamente pro indicatziones anzenas. Et ignorantzia de sos “barones de sa limba de oe”. Cussos chi no resessint galu a bessire dae sas lacanas de una limba cumpresa et impreada mescamente comente dialetu. Et mai comente limba natzionale. 

E su mamentu de la impitare  est custu. Unu de cussos mamentos in sos cales ammentamus unu anniversariu mannu et de importu. Comente sos milli numeros de su periodicu “Tottus in Pari”,fundadu et diretu dae s’amigu Massimiliano Perlato. Organu chi, dae su 1997, informat, cun regularidade, et cun passione, de totas sas atividades de sos circulos de sos emigrados sardos. Organizados o no. In Italia et in su restu de su mundu. Duncas, “Tottus”, pro me chi b’iscrio,  cheret narrer meda. Et deo b’iscrio in varios ambitos. Chi pertocant sa cultura, s’istoria, sa politica (no sarda ebbia). Chena ismentigare sas atividades de sos circulos (et mescamente cussas de su Circulu sardu de Monza de su cale so vicepresidente) et ateros ambitos de interessu comente cussu isportivu, bogadu a pizu dae pagu. Tottus in Pari est aberu s’unicu media et organu de s’Emigratzione sarda in su mundu. Sos ateros, chi ant sinnadu s’istoria de su Disterru sardu o sunt isparidos, o sunt istados minimados a periodicos chi bessint onzi tres meses. Est custu su esempiu de Su “Messaggero Sardo”, editadu dae su 1969 a su 2010 comente mensile. Et dae cussa data bessidu mescamente onzi tres meses et bortadu in “portale internet”. Un ateru datu chi faghet bisonzu de ammentare est chi “Tottus in Pari”, dae pagu, at sighidu sos de deghemiza followers chin prus de vintichimbemiza visitatores dae settantasettes Istados et prus de milli localidades italianas diferentes. Chin sas visitas chi, in su duamizavintibattor, sunt accudidas a prus de chentubarantanoemiza. Datos chi faghent orgogliu et sinnu de reconnoschentzia pro un omine, Massimiliano, chi est fintzas unu amigu. Unu chi, chena perunu finanziamentu publicu, a sa sola, petzi chin s’azudu nostru, est resessidu in custu miraculu. Chi est fintzas un’ arveschida noa de sa Cultura Sarda. Chi est rica et no povera. Ca sos poveros, comente at iscritu su poeta Melchiorre Murenu, “tenent in summa sas affliziones (…) et est pro cussu chi enin aggravados dae sas tantas tribulassiones”. Sa cultura et sos milli numeros de “Tottus in Pari” nos azuant at esser, in su pagu, semper prus ricos.