SAS RICERCAS ILLORAESAS DE CATERINA COSSA IMPRENTADAS IN VOLUMENE: INTERVENTU DE CRISTOFORO PUDDU A SA PRESENTADA DE “RACCONTANDO ILLORAI”

di CRISTOFORO PUDDU

Sas peraulas e sos ammentos collidos dae Caterina Cossa e imprentados in custu volumene, cun s’amparu de sa Biblioteca de Sardigna e de s’Editoriale Documenta, tituladu  “RACCONTANDO ILLORAI  ”, sunt sas boghes de sa zente nostra: omines e feminas chi ant acraradu sos sinnos pius fungudos de s’animu issoro pro nos mustrare dolos e gosos, prantos e risos chi contant s’istoria e s’identidade nostra de idha, de illoraesos de sos primos chimbanta annos de su Noighentos.

Nois semus su frutu cumpridu de sos Mannos nostros e costoimus intro de nois totu sos misterios de s’animu e de isperientzias vividas dae custa cumunidade costerina. Sos iscritos sunt testimonia de tempos andhados, ma totu nos lassant richesa de imparos e brenussiu de sentidos, de resones e de sinnos craros  in su chi fimus e in su chi devimus essere imberghindhe sustantzias dae su passadu… passadu chi est lessione e imparu pro sos tempos noos de oe e pro cussos benidores.

Custu viazu in sos ammentos de sos illoraesos nos mustrant unu “Continente” de notissias chi ‘ogant a campu s’anima de sa ‘idha e su sidhadu de sas memorias chi faghent e si faghent istoria. Duncas, unu pretziosu retratu de su chi fimus: mustrant sa natura, cumplicada e atatada dae sas contraditziones de sardos-illoraesos.

Sas cosas de ‘onzi die – su quotidianu – nos parent abitudines e si cunfundhint in zestos e peraulas chi carpint sas dies e su iscurrere mannantiale de su tempus; totu custu lassat surcos indelebiles e misteriosos de cambiamentu… chi a su momentu no semus in gradu de collire e cumprendhere.

Sas istajones de sa natura e de sa terra nos donant sos alimentos, mentres sas istajones de su vivere lassant milli donos de ammentos chi permitin de ‘idere sa vida e sa realtade cun ogros e abbaidadas sempre noas e diversas. Custos ammentos, collidos dae Caterina, sunu comente sas tesseras de unu mosaicu identitariu; elementos netzessarios de connoschentzia, pro cumprendhere e nos cumprendhere comente cumunidade de sa matessi ascra.

Custa ricerca, pesso, podet fintzas cuntribuire pro sestare unu prozetu, unu fraigu ideale de sa ‘idha nostra. S’esigentzia de collire sas espressiones e sos contados de vida, de sa zente de su populu sardu, est fintzas unu bisonzu de cussentzia pulitica e culturale pro sestare un’istoria moderna de sa Sardigna e pro afirmare sas particularidades de s’identidade nostra.

Tocat de riconnoschere s’energia culturale de Caterina e su contributu sou pro acrarare e daere valorizu a su patrimoniu de vida e de istoria locale. Dae sa ricerca, iscoberimus medas cosas de sa ‘idha nostra: sas conditziones de sa vida sotziale; sos legames de sos nucleos-cumunidades familiares; sa perdida e cunservatzione de sas traditziones; su sistema cumportamentale e de apartenentzia; sas suferentzias e sacrifitzios in sos traballos de campagna (massajos e pastores) e in totu sas fainas de domo (impignos primarios de sas feminas); riflessiones individuales… e ateru meda in chentuchimbanta pazinas e chentu contos de trintachimbe pessones.  Su libberu daet elementos de rifresssione e aberit zannas noas e disconnotas pro s’iscoberta de s’universu illoraesu. S’auguriu nostru a Caterina est chi potat sighire, sempre cun bona lena, pro ateros istudios e ricercas subra sa ‘idha, in modu de oferire connoschenzias a sos zovanos chi s’acrarant a vivere su terzu millenniu. Est craru chi sa ‘idha nostra no podet sighire a vivere chenza unu sensu forte de cumunidade e solidariedade, pro tessere tramas noas de isperanzia.

Custa sotziedade, chi namus moderna, at irmentigadu sos disizos e bisonzos beros de s’omine; e duncas, custos ammentos imprentados, nos serbin pro iscoberrere s’umanidade e sas resones de s’essere nostru in dies de mudamentos mannos. Devimus irvilupare e riconnoschere cantu est de importu in sa memoria populare e ndhe costoire s’ammentu de s’umanu patire e de su vivere. Sos Mannos nostros aiant cumprendhoriu de sa dignidade de su traballu – fin pessones de profundhidade de mente e de animu – e custos contados, de su volumene curadu dae Caterina cun passione e amore pro sa ‘idha e mascamente pro sa zente, ant unu significadu e sensu chi, lezindhelu, devimus carpire… est unu viazu in s’iscoberta de veridades e de istorias identitarias. Istorias nostras! Paris cun custa opera sunt bistados imprentados, dae pagu, fintzas sos ammentos subra sas bidhas de Lunamatrona, Nughedu San Nicolò, Nule e Santadi: iscritos chi nos mustrant, in modu craru, su vivere, su sufrire e s’atza de sas zente sarda e nos oferit unu modu nou de ‘ider sas cosas de domo nostra.