nella foto l'autrice della poesia in sardo
di Anna Maria Sechi
Nois sos fizos bastardos
Dare nos dèpimus sa manu,
Nois chi pagamus sos saldos !
Che sas fotzas giutas lontanu
dae sos bentos malignos,
Trainados semus dae s’uraganu !
Oe diventados fizos indignos
Chi siendas no ant tentu,
Nos negas tue bramados carignos !
Custu coro rendent iscuntentu
Tantas ingratas maneras,
Coro chi custodit s’ammentu!
Des sas atzurras lontanas costeras,
Chi l’aparint costante
Cun sas tuas dulches primaveras !
Fiera t’ido pomposa e galante,
Vives in s’anima mia,
Chi t’est restada fidele amante!
Terra de sa mia pitzinnia,
Pro ite non ti ses curada
Chi deo puru fizu ti fia ?
Mandadu m’as in terra furada
Accusende su distinu,
E de me, mai ti ses atristada !
Dadu m’as solu pro caminu
Tantu de m’apagare,
Pane, casu e unu ticu de ‘inu!
Inoghe, sas fortzas depo lassare,
Pro fàghere progrèdire,
Chie dadu m’at prus che pane!
Ohi, si veramente dias ischire
It’est sa domo anzena,
E-i su cotidianu cunsèntire!
Onni sùspiru est una pena,
In s’incripidu fronte,
Est una maglia de càdena!
Sena fine est custu ponte
Chi mi separat dae te,
Gennargentu, bellu monte!
Tropu atesu ses dae me,
Che orfanu bastardu,
Nudda a beru conto pro te !
Isula de mare e sole cardu,
Est triste e affannadu
Ogni tou lontanu fizu sardu!
Solu, dae sa mama abbandonadu
In d’una iscura carrela,
In disparte cun moros lassadu!
Lassadu dae sa sua bàndela
Pro sa cùmuna econòmia ,
De cairvone, atartzu e mòneda!
Cun piccos pesantes tracciant vias,
Sos fortes bratzos pilosos
Nde mustrant s’ issoro balèntias!
Sos disformados pòddighes callosos,
Narant a sa lughe
Chi fizos tuos sunt balorosos!
Forsis ses tue sa nostra vìrtude,
Chi faghes prolungare
Sa ‘olada e ispílida gioventude!
Bell’amante, chi ti faghes disitzare,
Su corpus nd’apo addolòridu
S’ammentu tou non m’est de passare!
So istranzu in logu iscoloridu,
E pagu poto faeddare
Sena nd’èssere ammutulidu!
Poto solu intendere e respirare,
Onnia ingiuria ratzista,
Ma non m’est permissu protestare!
Depo s’isfrèggiu propagandista
A sa muda cumpatire,
Ca istranieru so in ogni lista!
Inutiles sas lotas de anneantire
Colores e frontieras,
Per-fugas nachi narat –fuire-!
A nois das sas terras istranieras,
Solu fizu giamas tou,
Chie restat e si godit messeras !
De ingratitude as dadu prou,
Nudda nde riconnosches
Disumanu mundu ‘etzu, mundu nou!
Si puru tue non nos tocches
Cun lama de pugnale,
Ispiedadu su coro nos zocches!
E tue, terra nostra nàdia,
Ismentigada ti ses?
Chi t’amus dadu s’enèrgia?
