riferisce Giovanni Deias
Is atividades chi bolimus aparitzare pro s’imparu de s’iscritura in limba sarda ddas amus a organizare in tres mòdulos. Custos mòdulos ddos amus pensados pro persones chi galu no ischint nudda (o nd’ischint pagu) de comente si diat dèpere iscrìere in Sardu, nen leende in cunsideru is allegas locales, nen pighende a riferimentu is criterios de sa LSC. Non cherimus pònnere a una parte su chi pertocat s’isfera de sa cultura, a su mancu pro sa parte chi est acapiada a sa limba. Tando, in cada mòdulu s’ant a imparare piessìnnios de diferente genia, e ant a èssere organizados a manera chi is dischentes siant portados “a manu tenta” cara a una connoschèntzia prus manna de sa limba, chi non siat limitada a “su Sardu de bidda mia” isceti, ma imprasset totu su Sardu ponende is diferentes allegas totas in su matessi pranu. Ca non nos bolimus limitare a fàghere unu cursu de iscritura tènnicu ebbia, s’obietivu mannu chi nos semus ponende est su de nde fàghere a cumprèndere a is dischentes chi su Sardu est una limba unitària, mancari is pagas diferèntzias chi ddoe sunt in is allegas de totu sas biddas, e chi custa unitariedade de su Sardu est posta a base de sa LSC. Su caminu pro lòmpere a custu obietivu colat peri is tres mòdulos, sighende unu programma de màssima chi pro su Mòdulu III (Limba Sarda Comuna) est:
• Ite est una limba de cobertura. Raportu intre limba fitiana, limba literària e limba amministrativa
• Sa LSC non podet fàghere a de mancu de is allegas locales
• Sa Delìbera de sa Giunta Regionale n. 16/14 de su 18 de Abrile de su 2006
• Ortografia e Fonètica
• Grammàtica
• Su lèssicu est lìberu
• Parte manna at a èssere dedicada a s’iscritura cun sa LSC a suta de sa supervisione de su dotzente
