di Claudia Loi
|
Reconnoschimentu internatzionale meréssidu pro su cuncordu Collegium Karalitanum dirígidu dae Giacomo Medas: chenàbura 23 e sàbadu 24 de Maju 2014, ant a realizare tres esibitziones in giassos prestigiosos de Bartzellona: sa Sagrada Família, su Cunservatòriu de Música e sa iglesias antiga de Sant Agustí. Su progetu si nòmenat “Sa limba mea est mùsica”, e est patrotzinadu dae s‘Istitutu Italianu de Cultura de Bartzellona, chi at ammaniadu in collaboratzione cun s’Assòtziu de sos Sardos in Catalugna sas tres acuntèssias (fintzas cun s’apoju de sa Regione Sardigna, sa tzitade de Casteddu e s’assòtziu Incontri Musicali).
Su programma incluet cantzones in limba sarda reelaboradas pro cuncordu. At a èssere un’emotzione a ascurtare sas boghes de su Collegium intonare su “Deus ti Salvet Maria” in sa navada manna de sa Sagrada Famìlia, o sos rosàrios de Sardigna in sa crèsia bella e antiga de Sant Agustì, o “Cun d-unu biancu velu” de Antoni Sanna in s’inclàustru de su Cunservatòriu de Mùsica, in ue s’at a tzelebrare puru un’atòbiu cun sos professores e sos musitzistas locales pro faeddare de sas similitùdines intre sos duos idiomas, su sardu e su cadalanu, chi si aunint e si fundent in un’idioma ebbia: sa mùsica.Chenàbura 23 de Maju, 10.30h: Cunservatòriu de Música
Chenàbura 23 de Maju, 17h: Cuntzertu in sa Sagrada Familia (pro sos bisitadores) Sábadu 24 de Maju, 19.45h: Cuntzertu in sa crèsia de Sant Agustí (intrada lìbera) |
