MA CANDU??? IS PARTIDUS INDIPENDENTISTAS E SA POLITICA LINGUISTICA IN SARDINNIA

di Alexandra Porcu

Deu no apu mai scritu de politica, sceti unu pagu de politica linguistica. Ant a nai ca cussa picioca tedesca no at cumprendiu una cibudda de sa politica sarda. e est berus. Perou, castiendi ita ant fatu is partidus po sa lingua sarda in is urtimus annus, potzu nai chi s’arrepusta est: nudda.

In is urtimus diis apu ligiu meda inpitzus de su partidu nou de Sedda e Manincchedda e is criticas de Biolchini e Bolognesu (e aterus). Apu connotu a Frantziscu Sedda innoi in Berlinu tres annus a oi, in paris a Gavinu Sale, faendi unu seru in sa ICS (Imbassiada Culturali de sa Sardinnia in Berlinu), movimentu indipendentista in Berlinu de Pitzente Bianco, disterrau sardu, e amigu miu.

Po mei est stetiu su primu cuntatu cun d-unu partidu indipendentista (IRS) Deu no seu indipendentista, pensu chi is sardus ca bivint in Sardinnia depint lompi a fai s’indipendentzia. Perou, nci abarrat sa critica chi potzu fai, sa critica de filologa e linguista. E po nai sa beridadi, donnia linguista chi tenit unu interessu in sa lingua sarda, nolens volens depit essi unu pagu indipendentista. Sicomenti spereus ca cun s’indipendentzia sa lingua sarda a is sardus torrat.

Cali est su problema? Su prus mannu problema de sa genti chi tenint su leadership de is partidus, tenint totus s’italianu cumenti primu lingua. Unu pensamentu de unu amigu miu (Frantziscu Lai). Unu po studiai e po essi intelletuali in Sardinnia (normalmenti) no tenit su sardu cumenti primu lingua. Su prus chi est imparau, prus pagu chistionat su sardu.

Ita faint, insandus? Faint sempiri una parti minoredda in is programas insoru aundi ponnint puru sa lingua sarda, sicomenti ddu sciint chi is “sardus talebanus” ddos ant a criticai candu no nci est sa lingua sarda. Su problema perou, no est su programa feti. No est sintzillu fai unu programa linguisticu.

Sa critica mia est sa manera de si presentai a su populu sardu e a is sardus chi bivint afora (e bollu arregodai chi deu potzu votai in Sardinnia). E ita narrant po si defendiri?

Frantziscu Sedda est nasciu in d-una parti de sa Sardinnia aundi no si chistionat su sardu. perou ddu bolit imparai puru. (Ma candu?)

Adriano Bomboi, ddu bolit imparai puru. (Ma candu?)

Michela Murgia ddu chistionat, perou sceti in familia e cun is amigus e pubricat totu in italianu e fortzis una dii at a scriri calincuna cosa in sardu puru. (Ma candu?)

Omar Onnis, ddu imperat a bortas in su blog cosa sua, perou in is atobius mannus e in sa televisioni, no. Fortzis una dii ddu fait. (Ma candu?)

Paolo Manincchedda s’atera dii in su blog de Biolchini at scritu donnia arrespusta in italianu, su blog suu est in italianu e donnia arrexonada chi podis agatai in youtube de issu, est in italianu. Fortzis at a cambiai. (Ma candu?)

Gavino Sale no tenit unu programa politicu linguisticu perou, assumancu chistionat su criollu chi chistionat: Una frasia in italianu e una in sardu. Insandus, fortzis una dii fait unu programa linguisticu. (Ma candu?)

Bustianu Compostu, chistionat casi sempiri in sardu. perou est LSCista. Eja, perou totus podint imperai totu su sardu, no feti sa LSC. (Ma candu?)

Fortzis mi ndi seu scadesciu de calincuna de is “concas” de is partidus indipendentistas de is urtimus No creu. Si depint presentai de atera manera. No creu. Si depint presentai de atera manera.

Fintzas a candu unu chistionat in italianu, pensat in italianu. Chini narrat un atera cosa, narrat scillorius.Is pensamentus funt agataus a sa lingua e a sa curtura. Difatis genti meda mi narrat chi seu totu atera personi candu chistionu su tedescu, seu atera personi candu chistionu s’italianu, s’ingresu. e su sardu. Deu apu imparau su sardu poita bolia essi prus asoru a is pensamentus de is Sardus.Bolia intendi mellus sa terra sarda, sa genti sarda, is pensamentus de ajajus mius.

Insandus, po mei, is partidus indipendentistas e sa politica linguistica insoru no esistit, nimancu candu ponnint duas o tres cosixeddas in is programas suus. Ant a cambiai sa maner de pensai? Ant a imparai su sardu, ant a fai is presentadas in sardu, ant a fai una politica linguistica bene fata, po totus? Eja? Ma candu?. mai!

Dominigu, apu a essi in Monaco, Baviera. Su presidenti de sa Regioni Autonoma de sa Sardinnia, Ugo Cappellacci, at a fai una presentada. Ant cumbidau totu is presidentis de is Circulus Sardus in Germania e si papat in paris. Depu essi sena politica e sena opinioni personali, sicomenti in is Circulus no feus programas politicus.

No ddu sciu beni de ita at a chistionai su Presidenti Ugo Cappellacci, e craru chi apu a tenni arrespetu de issu. Sa Sardinnia dd’at votau. No pensu chi issu at a chistionai cun mei e pensu chi deu no apu a chistionai cun issu. Perou, se issu bolit sciri calincuna cosa asuba de s’emigratzioni sarda in Berlinu, mi iat a essi unu praxeri mannu de contai si-ddu.

Apu a contai de s’emigratzioni, de is fillus de is emigraus e de sa noa generatzioni ca est lompendi in custu momentu in Berlinu . de totu.

. perou in lingua sarda.