immagine di Ollolai
di Tonino Bussu
Puru in Ollolai si festat sa Die de sa Sardigna faveddande de sos fatos capitaos a sa fine de su ‘700 e de su fizu prus nodiu e famau pro sa vidda: Micheli Culumbu, sindicu, deputau italianu e europeu, iscritore da valia.
S’associatzione de Ollolai Divergentzias, cun s’azudu de s’assessorau regionale a sa istrutzione pùblica, in virtude de sa leze regionale n.44 de su 1993, at pessau de dedicare un’atopu pro faveddare de sa sarda rivolutzione de sa fine de su ‘700 tratande de sa prova chi ant fatu sos frantzesos de occupare sa Sardignain su 1793, de sa rebellia de su 28 aprile 1794 bulliandeche a foras de Sardigna sos pieontesos e de sas lotas de Giomaria Angioy pro cumbatere su feudalesimu.
A pustis sos saludos de su sindicu de Ollolai Marco Culumbu e de s’assessore cumonale a sa cultura Frantziscu Barone, s’at a chistionare de Micheli Culmbu illustrande s’opera sua siat comente politicu e siat comente iscritore.
Difatis mentres prima b’ant a èssere letturas de sos pitzinnos de s’iscola media pro sa sarda rivolutzione, a pustis ant a comintzare sas relatziones de Tonino Bussu e Frantziscu Casula.
Tonino Bussu at a tratare de Micheli Culumbu comente politicu, de sa casione chi fit sindicu de Ollolai, de sa marcia pro sa rinaschida dae Casteddu a Ollolai e a Tàtari in su 1965, de su impignu suo in su partidu sardu, siat comente segretariu e siat comente presidente, e in sa camera de sos deputaos e in su parlamentu europeu.
Frantziscu Casula at tratare de Micheli Culumbu comente iscritore, de sas operas suas, ‘L’Aurora è lontana’ e ‘Senza un perchè’ , de sos iscritos giornalisticos e de sa batalla pro sa limba e s’identidade de sa Sardigna.
Custu est su primu impignu chi in Ollolai s’at a fàghere pro onorare sa frigura de Micheli Culumbu chi est mortu in su mese de trivulas de su 2012.
