immagine di Olzai
di Tonino Bussu
Chenapura 24 de maju 2013 in Orthai, in s’auditorium Mesina, a sas chimbe de bortaedie, s’amministratzione cumonale, cun s’azudu de s’assessorau regionale a s’istrutzione pùblica in base a sa leze regionale 44 de su 1993, at detzisu de festare sa die de sa Sardigna faveddande de sa sarda rivolutzione de sa fine de su ‘700 e de sos tres parlamentares de Orthai chi sunt Frantziscu Dore, Frantziscu Murgia e Battista Culumbu.
A pustis su saludu de su sindicu Tonino Ladu e de s’assessora cumonale a sa cultura Marisa Concas, at a intervennere sa professoressa Paula Mereu chi at a tratare de su tentativu de ocupare sa Sardigna dae parte de sos frantzesos, de su bulluzu de su 28 de aprile de su 1794 cando sos sardos ch’ant bulliadu sos piemotesos a foras de s’isulas imbarcandenchelos car’a su continente, e de sos motos antifeudales incorazados dae Giomaria Angioy.
A pustis at a picare sa paragula s’àteru reladore, chi est su professore Tonino Bussu, chi at a chistionare de sos tres deputaos chi Otzai at tentu in su novichentos e chi sunt su medicu Frantziscu Dore, s’avogadu Frantziscu Murgia e su Dirigente Culturale Battista Culumbu.
Tres personagios chi si sunt distintos totus a tres in su triballu issoro, comente dotore unu, comente avogadu s’àteru e comente mastru e lotadore contr’a s’analfabetismu su de tres.
Pessonagios chi ant frecuentau sa Camera de sos deputaos, durante sa Prima Gherra Munduale e a pustis finas a su 21, Frantziscu Dore, in s’Assemblea Costituente e in sas primas duas legisladuras repubblicanas e parte de sa de tres, Frantziscu Murgia, a fine sèculu belle, dae su 1983 a su 1992, Batista Culumbu.
Duncas chistionande de sa vida de custas tres pessones podimus nàrrere chi si attraersat prus de unu sèculu de istòria de sa Sardigna chi issos ant biviu, cadaunu in su settore suo e tentu contu puru chi tra issos si sunt binas connotos.
Difatis Frantziscu Dore podimus nàrrere chi at fatu de mastru a sos àteros duos, prima a Frantziscu Murgia, chi est unu babbu de sa Costitutzione repubblicana ca at contribuiu issu puru, e amus a biere comente, a iscriere sa Costitutzione repubblicana de s’Italia, ma puru pro Batista Culumbu ca abitaiat a minore serente a sa domo de Frantziscu Dore e duncas non podiat non tennere una benefica influentzia dae cust’omine, oramai betzu, chi si fit ritirau dae sa vida politica, ma non dae s’impignu civile in cuntrastu cun su fascismu.
Ecco custos sunt sos temas chi s’ant a trattare in Orthai chenapura 24 de maju dae sas chimbe de bortaedie in susu.
A pustis sas relatas at a cungruire in bellesa su coro polifonicu de Orthai cun sos canticos suos.
