l'abitato di Gavoi
di Tonino Bussu
S’at a faveddare de istoria, de litteradura, de musica e de arte, cras, dominica 29 de aprile, in Gavoi grassias a unu progettu presentadu dae s’amministratzione cumonale e finantziadu dae s’assessorau regionale a sa pubblica istruzione.
Si nd-at a chistionare in sa biblioteca comunale de via Don Bosco, a sas chimbe de bortaedie, paris cun sos Tumbarinos, sos zovanos chi an a criare mamentos de allegria cun sas musicas issoro e cun sas artes, sas pinturas chi an afagher mentres, a pustis sos saludos de s’assessore cumonale a sa cultura Elena Mastio, sos relatore Tonino Bussu e Luca Sedda an a trattare temas de istoria e de litteradura, de eris e de oje, partinde dae sos fattos de su 28 de aprile de su 1794 pro arribare a s’istoria attuale, pro trattare de sa letteradura moderna e contemporanea.
Est unu modu pro connoschere s’istoria nostra, ma puru sa litteradura chi a bortas est prus pacu connotta de s’istoria e totu.
Ma custu seperu de s’amministratzione est finas una manera pro impignare sos zovanos in fainas de grandu importu chi faghen onore a issos interessandelos de musica e de arte, pro poder comunicare a sos ateros, mannos e minores, chi pro cambiare e mezorare sa realidade sarda e duncas puru barbaricina, est necessariu a si moere, a esprimere e bogare a campu sas menzus ideas in modu de partire dae sa cultura, dae sa connoschentzia pro fravicare unu cras prus bonu, prus civile, prus liberu, superande su pessimismu e ponende in parrer cadaunu sas menzus calidade suas pro azudare sas comunidades nostras a issire dae custa mandra inube calicunu no che cheret serrare cumbinchendennos chi non b’est prus ispera de mezoria pro zovanos e mannos de oje e de cras.
E tando bastat a appompiare sa situassione de eris, chi s’istoria e sa litteradura nos contan, pro nos dare e ponner corazu, pro andare a dainnantis ca su venidore lu depimus fravicare nois, no isettare chi nollu frabichen sos ateros.
E in custu nos podet azudare siat s’istoria e sa litteradura e sian sas artes musicales e de pintura.
